Ĉiutaga legado kaj meditado de la Biblio estas la nutraĵo, la spiro, kaj la lumo de la vivo de ĉiu kristano. Supozeble, tiu ĉi legas, studas, meditas kaj ankaŭ preĝas en la gepatra lingvo. Sed, kial ne preni alian tempon por tion fari ankaŭ en Esperanto. Adebayo Ola Afolaranmi, Niĝeria pastoro kaj Esperantisto, tie proponas al ni plian ŝtupon. Apud la teksto de la elektita versiklo, li aldonas mallongan komenton por mediti kaj praktiki. Kompreneble, oni povus elekti aliajn versiklojn, proponi aliajn komentojn, eĉ foje malkonsenti kun la aŭtoro. Tamen, estas tie okazo por mediti kaj plivigligi sian fidon. El la multaj eblecoj kiujn proponas al ni la Biblio, la aŭtoro faris elekton, prenis tion, kion li pensis esenca por nia spirita kresko, kaj tiel konsistigis diĝeston. Kiel la profetoj maĉis kaj manĝis la rulaĵojn, ni ankaŭ devas nutri nin per tiu spirita nutraĵo kiu estas la vivanta vorto de Dio, lasita al la homaro por paroli al ni pri Jesuo Kristo.