En la Okcidento la afero estas tute klara: Ruslando agresis najbaran landon kaj tio estas punenda. Kaj oni liveras pli kaj pli pezajn armilojn al la agresata lando por ke ĝi povu sin defendi kaj - laŭ ties aserto - rekonkeri ĉiujn teritoriojn perditajn al Ruslando. Unu aspekto el tio estas prava: La rusa invado estas kontraŭa al la popoljuro. Sed se iu kuraĝas mencii la fonon de tiu ĉi milito, kiu NE komenciĝis per la rusa invado al Ukrainujo, tiu estas tuj silentigata per la akuzo ke temas pri retoriko de Putin ... En landoj de la NATO oni sekvas la politikon de Usono de subteno al Ukrainujo tiom, ke la informa kaj diskuta klimato tie estas milita, kaj grandskale mensoga (tiu, kiu diras nur la duonan veron, diras mensogon). Por restarigi la tutan karakteron de tiu ĉi milito, nepre necesas koni ĝian fonon. Kaj jen Peter Wahl montras la fonon, laŭ kiu tiu ĉi milito okazas.