"Ĉi tiu libro ne estas nur libro. Ĝi vere estas minejo, minejo de informoj pri la sudafrika movado kaj pri unu el ĝiaj ĉefaj rolantoj, Axel von Blottnitz. Ne serĉu rigoran ordon en minejo, kie faktoj amasiĝas en montoj, kiuj estas unu apud la alia. Kaj la montoj en ĉi tiu verko estas multaj. En la fino de la pasinta jarcento nova fenomeno komencis doni novan sangon al la sudafrika Esperantujo. Al la ekonomie bonfarta lando komencis alveni enmigrintoj el aliaj afrikaj landoj kaj inter ili ankaŭ esperantistoj. Ĉi tiuj montris grandan entuziasmon kaj iugrade komencis puŝi la tradician movadon. Inter ili estas la verkinto de ĉi tiu libro, Elisee By'Elongo Ish'Eloke. Suda Afriko nun estas el la tiel nomataj landoj BRICS (Brazilo, Rusujo, Barato, Ĉinujo kaj Suda Afriko). Tio verŝajne kunportos pli da internaciaj rilatoj kun la aliaj landoj en tiu grupo, kio ne povos ne influi pozitive. Unuvorte, la estonteco de la movado en Suda Afriko estas, se oni estas optimisto, pli promesplena ol ĝi estis en la estinta tempo, kiam ĝi vivis kvazaŭ en izolita teritorio en Afriko." (Renato Corsetti, prezidinto de UEA)