Ina Jesu Christali khuisanglaga Bible pakaphok eina seiha sada Varewui kathukka ningpamchi theiphokka. Ina kakhum eina seiha samamanda zingkum kashini kakashung eina Varena ngahankami. Ina church haophok kahaiwui thili Mangla Katharawui manga eina Biblewui kathukka tui tarakha ili maikhaimi, chiwui alungli khamataiya chiya 'Ning, Mangla, kala Phasa' hina. Ngakheikhang kahai khararchan hina mikumowui haokaphok kala ithum khatta hiwui maramli theikhui ngasakka. Hi ina kachilikhawui eina mashalakrang kachi tuipongna kala hi kathei eina mahang kharar ringkapha samphanga.